Зәңгәр күк йөзендә кояш балкыган чакта, шаулап-гөрләп апрель ае килгәндә, безнең яраткан шагыйребез Габдулла Тукай туган. Аңа быел - 124 яшь. Рәхмәт, апрель! Син безгә татар халкының сүнмәс учагы, бөек шагыйрьне бүләк иттең. Ул - татар шигъриятенең диңгезендә маяк булып яшь шагыйрьләргә юл күрсәтеп бара. Аның шигырь, җыр һәм әкиятләре балаларны укуны, эшне яратырга, табигатьне сакларга өйрәтә.

      Шагыйрьнең туган көне уңаеннан мәктәбебездә күп төрле чаралар үткәрелде. "Г.Тукай - безнең йөрәктә" дигән композиция төзелде. "Без Тукайны беләбезме?" дигән әдәби викторина үткәрелде. Башлангыч сыйныф укучылары "Чәчәкләр куегыз Тукайга" дигән әдәби - музыкаль чара үткәрделәр. 9 нчы сыйныф укучылары тарафыннан "Күңелләрдә яши яшь Тукай" дип исемләнгән  радиотапшыру әзерләнде.

      Туган тел бәйрәме укучылар өчен бик күңелле һәм файдалы үтте.